الطرب الجميل والغناء الرصين صالح الضي نموذجاً


الطرب الجميل والغناء الرصين صالح الضي نموذجاً
الطرب الجميل والغناء الرصين صالح الضي نموذجاً


05-22-2011 06:00 AM
محمد سليمان دخيل الله:

يا وجهاً علم البدر معاني الفجر
وأشرق سحراً ثم أضاء
يا من تقتل فينا الخوف
وتطلع همساً كالحياة
في أي مكان
في أي زمان
أي خريف
أي شتاء
قد جئت ربيعا
غمر الصيف
وحول وجه الدنيا
فصلا اخر حيث أفا
انت لنهديك الورد
ولكن للحب نهديك
ان كان هذا بعض وفاء
الكلمات السابقة هي اغنية رائعة للفنان صالح الضي وهي من كلماته وألحانه وبها قتل الخوف في نفوس مستمعيه، وابان عن شخصه الذي يحمل الحب ويهمس بكلماته في الحياة وهو واحد من عمالقة الغناء في السودان وفنان مبدع ومتفرد في ادائه والحانه وغنائه، ورقم كبير في خريطة الغناء السوداني وقد اسهم في تشكيل الغناء الحديث في السودان.. وقد كان والده الضي آدم بروجي في القوات المسلحة لذلك تشبع بالموسيقى منذ طفولته وقد كان ذلك بمدينة الابيض التي حضر اليها صالح الضي وعمره سبع سنوات .
وقد كان والده الضي عازفا ماهرا حتى لقب بالبروجي لذلك كان للسنين الاولى في عمره وهو يعيش في اجواء الموسيقى، اثر في بنيته الموسيقية، وتعلم الايقاعات وهو طفل من خلال صفقات الكرير التي كان والده مجيدا فيها.. وجاء صالح برفقة اخيه عازف الكمان محمد الضي لام درمان وتعلم محمد الضي العزف على الكمان على يد الموسيقار اسماعيل عبد المعين حتى صار من المميزين فيها.
لذلك تفرد صالح الضي في طريقة الاداء وذلك من خلال تعرفه على تفاصيل الغناء والشعر والموسيقى وقد سكن في البداية مع فنانين كبار كانوا يتطلعون لان يصبحوا عمالقة في ذلك الزمان وهم أحمد المصطفى وابراهيم الكاشف وحسن عطية وابراهيم عوض لذلك نجد ان من سكن معهم صالح الضي صاروا ارقاما في الغناء السوداني وهم خليل اسماعيل وابو عركي البخيت ومحمد الامين واسحق الحلنقي، وما اسعده من سكن وانه بيت فن وفنانين وكلهم من اصحاب الطرب الاصيل والشجن النبيل لذلك نجد ان صالح الضي اضاء كثيرا في الغناء السوداني وتناول الكلمة الرصينة ودزون عددا من الاغنيات بملكات مبدعين ومن اغنياته عيش معاي الحب كلمات رفيقه في السكن الشاعر اسحق الحلنقي:
عيش معاي الحب
عيش معاي حناني
ايه يضرك تسأل
يوم علي يا غالي
وانت وحدك عارف همي
عارف حالي
وكانت هذه الاغنية بداية انطلاق الشاعر اسحق الحلنقي وهي التي ظل الناس يرددونها الى يومنا هذا لانها محفورة بذاكرة من ينشدون الطرب الجميل.. وفي نهاية الستينيات شد الرحال الفنان صالح الضي للالتحاق بالمعهد العربي للموسيقى وزامل الفنان سيد خليفة والعازف محمديه وواصل انتاجه الغنائي من القاهرة وكتب ولحن وغنى اجمل اغنياته رسالة:
يا طير يا ماشي لاهلنا
بسراع وصل رسايلنا
والشوق ما تنسى يا طير
لكل البسألك عنا
قول ليهم على العهد ما زلنا وما زلنا
ذكراهم انفاسنا ومشاغلنا
كيف حال بستانا وخمايلنا
وربوتنا مجمع شمايلنا
انا في انتظارك يا طير على ناري
وصل رسايل وأدي البشاير
وافرد جناحك يا طير على داري
قبال تعود لازم تروح من تاني مرة
ما تنسى زول في الحلة الا تسلم عليهو
وتحضن ايديه
يا طير يا ماشي لاهلنا
وكلمات اغنية رسالة كلمات بسيطة لكنها عميقة المعاني تحمل معاني الشوق في الغربة وتصور الفنان صالح الضي وهو يواسي نفسه بهذه الكلمات في بعده عن الاهل والوطن وهذا هو الطرب الذي يخاطب الوجدان.
ومن الاغنيات الخالدة في مسيرة الغناء السوداني اغنية الميعاد وقد كتب كلماتها ولحنها وغناها الفنان صالح الضي وان هذه الاغنية تاريخ من الزمن عاشته وكتبها العاشقين في خطابات الحب لان فيها صدق الشاعر والفنان:
اوعى تطول البعاد وانت عارف شوقي كم
اوعك تخلف الميعاد
وتسيب لي الألم
بستناك وقلبي خافق في لحظات العشم
وغنى الفنان صالح الضي من كلمات اسحق الحلنقي:
بتتغير:
بتتغير.. بتتغير.. بتتغير
اقول ما انت.. انحنا كمان بنتغير
وزي ما عيونك الحلوين.. بتتحير
نحن كمان بنتحير
واغنيات الفنان صالح الضي من الاغنيات الراسخة في اذهان محبي الغناء الجميل وذلك لتميز صوت صالح الضي ولجمال الالحان.. وقد غنى مع الشاعر ابو امنة حامد
نحن ما ناسك:
لو بتلقى زول بحبك زينا
زول بشيلك في عيونو وفي ضلوعو
وفي دموعو وفي ابتسامتو وهناهو
في شجونو .. ما بنعاتبك
يا ما جيناك ويا ما بابك
لو بحس دقات قلوبنا
٭ إن صالح الضي امتاع جمالي في عالم الغناء وشدو وطرب وتطريب موسيقي وايقاع وكمات، ومع ابو آمنة حامد شدا صالح الضي وضحك مع ضاحك المقلتين:
احتشد العمر حبا
في لحظة لحظتين
وفاض ثم تلاشى
في ضحكة المقلتين
الا بقايا ارتعاش
ومن كلمات ابو آمنة حامد كان اللقاء المستحيل بين صالح الضي والالحان والغناء:
سألت عينيك وعدا وذبلت قبل الوصول
فوق احتمال فعفوا لقياك المستحيل
في نظرة الورد لينا
في شموخ النخيل
هل سطوة الحسن الا اعتداد ظبي كحيل
واختار الفنان صالح الضي كلمات دلال للشاعر بابكر عبد الرحمن:
إن قلت والله بيحبوني
يزداد دلالم ويسلوني
وإن قلت خليتو هواهم
يشكو الهوى ويلوموني
ان الفنان صالح الضي كان متميزا في غنائه في الحانه وقد غنى من كلمات خليفة الصادق «سلوان»:
سوف انساك وانسى كل شيء عن هوانا
وسأنساه زمانا علق النفس زمانا
وسأمحوه غراما.. غراما
ومن كلمات الشاعر محمد علي ابو قطاطي غنى ولحن صالح الضي ازهار المحبة:
قالو لي اترك هواهم
وانسى ايامك معاهم
كيف يهون بعد الحبايب
وقد كان الفنان الشاعر الملحن صالح الضي قلقا في حياته وهو قلق الفنان يسافر لبورتسودان ثم يعود للخرطوم ويشد الرحال للقاهرة ثم يعود.. كان يبحث عن الفن لذلك نجده كتب معظم اغنياته ومنها الايام والليالي:
يا ليالي الحب
انتي وين يا ليالي
وألف اغنية عهد الدموع:
في الحالة دي يا نفسي طيبي واسعدي
نلتي المراد الكنتي دائما تنشدي
ومن اغنياته التي قام بتأليفها «دنيا ـ ونهر الحب ـ ويا عينيه ـ ويا جميل يا حلو».
وقد كان فنانا صاحب صوت جميل واستطاع ان يلحن كل اغنياته وهو ابن الموسيقار البروجي الضي.. وغنى في السودان وخارج السودان بإذاعة السودان وبركن السودان بالقاهرة وكان سفيرا للاغنية السودانية ورحل سريعا عن هذه الدنيا لكن تظل كلماته وموسيقاه وغناؤه شاهدا على فنان كتب اسمه بأحرف من نور في الغناء السوداني، وكان واحدا من الاساطين الذين اضافوا للغناء وحقا انه الشدو الجميل الذي شدا به ساكنو البيت الواحد محمد الامين والحلنقي وخليل اسماعيل وابو عركي، وقد صاروا نجوما وحاملي راية الغناء الحديث، وصالح الضي واحد منهم.. التحية لاهله ولابنته عزيزة ولعاشقي الطرب الجميل والرصين والسلام.
المقال منقول من صحيفة الراكوبة مع تحياتى المدون " عوض الطاهر"

ليست هناك تعليقات:

إرسال تعليق